Náttúran.is

Framfylgd skilyrða í úrskurði um Kárahnjúkavirkjun könnuð

Svandís Svavarsdóttir umhverfisráðherra hefur falið Umhverfisstofnun að kanna hvernig staðið hefur verið við þau skilyrði sem umhverfisráðuneytið setti í úrskurði um mat á umhverfisáhrifum Kárahnjúkavirkjunar í desember 2001.

Í úrskurði ráðuneytisins var fallist á framkvæmdina með 20 tölusettum skilyrðum sem var ætlað að draga úr umhverfisáhrifum virkjunarinnar. Framkvæmdaraðila var falið að sjá til þess að skilyrðunum yrði fullnægt. Rekstur virkjunarinnar hefur nú staðið í á þriðja ár.

Svandís Svavarsdóttir umhverfisráðherra segist hafa fengið ábendingar um að ekki hafi verið staðið við öll skilyrðin sem sett voru í úrskurðinum og þess vegna hafi hún falið Umhverfisstofnun að kanna það sérstaklega.

Sjá úrskurð ráðuneytisins um umhverfisáhrif Kárahnjúkavirkjunar.

Einkunn

Óður til hreindýrsins

Ríki Vatnajökuls stendur fyrir málþing á Vetrarhátíð WOW undir yfirsögninni \342\200\236Óður til hreindýrsins\342\200\234 en málþingið verður haldið í Nýheimum á Höfn í Hornafirði miðvikudaginn 31.mars nk.

Setning 10:30 Signý Ormarsdóttir Menningarráði Austurlands

• Saga hreindýra á Íslandi, Skarphéðinn G. Þórisson Náttúrustofa Austurlands
• Lifnaðarhættir hreindýra í nýju ljósi, Skarphéðinn G. Þórisson NA
• Veiðistjórnun hreindýraveiða, Jóhann G. Gunnarsson UST
• Hreindýr í ferðaþjónustu, Ásta Þorleifsdóttir Markaðsstofa Austurlands

12:00 - 13:00 Hádegishlé og handverksupplifun

• Hreindýrabóndi á Íslandi- reynslusaga, Aðalsteinn Jónsson Klausturseli Jökuldal
• Upplifun veiðimannsins, Emil Björnsson
• Með linsuna að vopni, Skúli Ben hreindýraleiðsögumaður
• Auðlendur, Fjölnir Torfason ferðaþjónustubóndi, Hala í Suðursveit
• Auðlindin hreindýr, hagsmunasamtök um nýtingu hreindýra, Aðalsteinn Jónsson
• Vinir Vatnajökuls, hollvinasamtök Vatnajökulsþjóðgarðs, Kristbjörg Hjartardóttir

14:30 - 14:45 Kaffihlé

14:45 - 15:30 Pallborðsumræður, stjórnandi Þorvarður Árnason Umhverfisfræðingur

Handverksfólk og hönnuðir sýna og selja afurðir sínar í miðrými Nýheima

16:00 - 18:00 Óvissuferð á hreindýraslóðir með meiru

19:30 Matur úr héraði, Hótel höfn kvöldverður úr matarkistu Austur og Suðausturlands
Óður til hreindýrsins, Charles Ross frumflytur tónlistaratriði

Tilkynna þarf þátttöku fyrir föstudaginn 26. mars, tilkynna þarf sérstaklega þátttöku í kvöldverð

Fundarstjóri er Rósa Björk Halldórsdóttir, framkvæmdastjóri Ríki Vatnajökuls, ferðaþjónustu, matvæla,- og menningarklasa Suðausturlands

Einkunn

Opinn fundur um vistferilsgreiningar

Föstudaginn 26. mars kl. 14:30-15:45 býður námsbraut í umhverfis- og auðlindafræði við Háskóla Íslands upp á opinn fund um vistferilsgreiningar í Lögbergi, Háskóla Íslands, stofu 101. Fyrirlestrar fara fram á ensku og gert er ráð fyrir umræðum eftir framsögur.

What is LCA? How an LCA tool can help on carrying out LCA.
Some practical examples of industries using LCA
Dr. Larisa Maya Altamira, Consultant at PE North West Europe in Denmark.

Examples of the use of LCA in the construction sector
Dr. Harpa Birgisdóttir, Researcher at The Danish Building Research Insititute.

Allir velkomnir!

Um vistferilsgreiningu:

Vistferilsgreining (e. Life Cycle Assessment, LCA) er aðferðafræði sem notuð er til þess að meta umhverfisáhrif vöru, framleiðsluferils eða þjónustu frá vöggu til grafar. Markmiðið með LCA er að meta hvar í ferli hverrar vöru, ferils eða þjónustu mestu neikvæðu umhverfisáhrifin verða og hvernig megi haga hönnun vörunnar og framleiðslu þannig að þau séu lágmörkuð. LCA er mikið notað til þess að bera saman mismunandi valkosti.

Notkun aðferðarinnar má sjá í auknum mæli í regluverki Evrópusambandsins, t.d. í úrgangsmálum. Aðferðin er einnig mikilvægur þáttur í vottun vistvænna bygginga í Evrópu auk þess er verið að þróa staðla fyrir framkvæmd LCA innan Evrópusambandsins, m.a. fyrir byggingar og byggingarefni. Aðrar iðngreinar, s.s. matvælaframleiðendur og stálframleiðendur, spila einnig stórt hlutverk í útbreiðslu LCA og hafa bæði innleitt LCA í vöruþróun og hafið þróun á stöðlum eða vottunarkerfum.

Nú er í annað sinn boðið upp á námskeið í vistferilsgreiningu við Umhverfis- og auðlindafræði við Háskóla Íslands. Í tengslum við það býður námsbrautin til opins fundar þar sem kennarar á námskeiðinu kynna aðferðarfræðina, hvernig nota megi LCA hugbúnað til þess að framkvæma vistferilsgreiningu og dæmi um notkun LCA.

Einkunn

Svifryk yfir mörkum og 39% á negldum

Hlutfall negldra dekkja í Reykjavík var talið miðvikudaginn 17. mars. Hlutfallið skiptist þannig að 39% ökutækja voru á negldum dekkjum og 61% var á öðrum dekkjum. Á sama tíma í fyrra var hlutfallið 42% negld á móti 58% ónegldum. Búist er við að styrkur svifryks verði yfir heilsuverndarmörkum í dag og á morgun.

Hvössum vindi er spáð í Reykjavík í dag, 23. mars, en engri úrkomu. Þannig að það er líklegt að svifryksgildi muni fara hækkandi í dag - og farið verði yfir heilsuverndarmörkin í 12 sinn á þessu ári, segir Anna Rósa Böðvarsdóttir heilbrigðisfulltrúi og að jafnframt séu líkur á að svifryksgildi verði há á morgun, 24. mars, þar sem spáin er svipuð. Svifrykið berst meðal annars frá samgöngum í borginni, en ryk hefur safnast upp í vetur, framkvæmdasvæðum og öðrum uppsprettum.

Styrkur svifryks klukkan 10.30 í morgun var 43 míkrógrömm á rúmmetra á mælistöð Umhverfis- og samgöngusviðs við Grensásveg. Ég býst við að mælistöðvarnar við Grensásveg og leikskólann Furuborg munu fara yfir heilsuverndarmörk í dag og á morgun, segir Anna Rósa, en heilsuverndarmörkin eru 50 míkrógrömm á rúmmetra.

Einkunn

Jarðminjagarðar á Íslandi - Eldfjallagarður á Reykjanesskaga

Miðvikudaginn 24. mars næstkomandi verður haldið málþing um jarðminjagarða (Geoparks) á Íslandi í Salnum, Hamraborg 6, Kópavogi.

Dagskrá:

12:30 - 12:40 Setning - Þorsteinn Sæmundsson, formaður Jarðfræðafélags Íslands og forstöðumaður Náttúrustofu Norðurlands vestra
12:40 - 12:50 Ávarp - Svandís Svavarsdóttir, umhverfisráðherra
12:50 - 13:00 Ávarp - Óskar Bergsson, formaður Borgarráðs
13:00 - 13:20 Eldfjallagarður og jarðminjar á Reykjanesskaga - Helgi Páll Jónsson, Náttúrustofu Norðurlands vestra
13:20 - 13:40 Jarðfræði Íslands, sérstaða og tengsl við heimsmynd jarðfræðinnar - Ármann Höskuldsson, Jarðvísindastofnun Háskólans
13:40 - 14:00 Hvers virði er landslag? - Hreggviður Norðdahl, Jarðvísindastofnun Háskólans
14:00 - 14:20 Hvað er jarðminjagarður? - Lovísa Ásbjörnsdóttir, Umhverfisstofnun
14:20 - 14:40 Frá Þingvöllum til Reykjaness: Eldvirknigarður á Suðvesturlandi - Ari Trausti Guðmundsson, jarðeðlisfræðingur

14:40 - 15:10 Kaffi

15:10 - 15:30 Eldfjallagarður á Reykjanesskaga - Ólafur Örn Ólafsson, bæjarstjóri Grindavík
15:30 - 15:50 Aðdráttarafl jarðfræðinnar - hugmyndir um geopark á Íslandi - Rögnvaldur Ólafsson, Stofnun fræðasetra Háskóla Íslands
15:50 - 16:10 Jarðminjagarðar og ferðaþjónusta - Ólöf Ýrr Atladóttir, ferðamálastjóri
16:10 - 16:30 Jarðminjagarður á Suðurlandi - Sveinn Pálsson, sveitarstjóri í VÍk
16:30 - 16:50 Frá Háleyjabungu að Hafnabergi: Jarðminjar, orka, náttúra - Kristján Pálsson, formaður Ferðamálasamtaka Suðurnesja
16:50 - 17:10 Samband jarðfræðilegrar og líffræðilegrar fjölbreytni á Íslandi - Skúli Skúlason, Rektor Háskólans á Hólum
17:10 - 17:20 Lokaorð - Ingvar Atli Sigurðsson, forstöðumaður Náttúrustofu Suðurlands

Fundarstjóri: Hilmar J. Malmquist, forstöðumaður Náttúrufræðistofu Kópavogs

Aðgangur ókeypis. Þátttaka tilkynnist á netfangið steini@nnv.is fyrir 22. mars.

Að málþinginu standa Jarðfræðafélag Íslands, Náttúrustofa Suðurlands, Náttúrustofa Norðurlands vestra, Náttúrustofa Reykjaness, Náttúrufræðistofa Kópavogs, Umhverfisstofnun og Náttúrufræðistofnun Íslands.

Einkunn