Náttúran.is

Alþjóðlegur dagur sanngjarnra viðskipta/Fair Trade

Gefum taktinn fyrir sanngjarnari heimi!

Þann 8. maí verður Alþjóðlegur dagur sanngjarnra viðskipta haldinn hátíðlegur um allan heim. Í fyrra tóku um 8 milljónir manna þátt og létu Íslendingar að sjálfsögðu ekki sitt eftir liggja.
Í ár munum við auðvitað gera gott betur og fjölmenna niður á Austurvell kl. 15 til að berjast gegn fátækt, ósanngirni og barnaþrælkun. Við berjumst fyrir félagafrelsi og lýðræði og styðjum lífræna ræktun með jákvæðum aðferðum.

Yfir tvöhundruð viðburðir hafa verið skipulagðir í öllum heimsálfum og eru þeir af öllum stærðum og gerðum og má þar nefna teppamarkaði, sölubása, vínsmökkunarkvöld og götuhátíðir. Hér á Íslandi munum við slá trumbur í takt við íbúa Svasílands, Bretlands og fleiri landa sem efna til trumbuhringja í tilefni dagsins og byrjar dagskráin hér á landi kl. 15 þann 8. maí á Austurvelli.
 
Stomphópur mun mæta á staðinn og troða upp og trumbuhringur Hlutverkasetursins sýnir okkur hvernig berja á húðirnar. Að auki verða eigendur Fafu leikfanga á staðnum með heldur óhefðbundnar Fairtrade vörur.

Hápunkturinn verður svo þegar við sameinumst í einn stóran trumbuhring til að láta boðin berast sem hæst og hvetjum við alla til að taka með sér sín eigin hljóðfæri, jafnt heimatilbúin sem önnur!
 
Auðvitað getum við breytt heiminum!

Sjá Fair Trade búðina og Fair Trade deildina hér á Náttúrumarkaði.

Einkunn

Þrengir að lífrænni ræktun

Stefán Gíslason umhverfisstjórnarfræðingur með meiru heldur áfram að fræða okkur um Kleppjárnsreykjamálið á bloggsíðu sinni:

Í bloggfærslu minni 19. apríl sl. átaldi ég stjórnvöld í Borgarbyggð fyrir slælega stjórnsýslu við afgreiðslu umsagnar um tillögu Umhverfisstofnunar að starfsleyfi fyrir ORF Líftækni hf., „vegna starfsemi með erfðabreyttar lífverur í gróðurhúsi Sólhvarfa ehf., Kleppjárnsreykjum“. Hin slælega stjórnsýsla endurspeglaðist í því að stjórnvöldin fóru ekki að þeim reglum sem þau höfðu sjálf sett sér um starfshætti nefnda.

Um hvað snýst málið?
Umrætt blogg snerist fyrst og fremst um meðferð málsins en ekki innihald þess. Hér á eftir ætla ég hins vegar að fara nokkrum orðum um innihaldið og hvers vegna málið er stærra en svo að forsvaranlegt sé að afgreiða það eins og hverja aðra umsókn um undaný águ frá banni við hundahaldi. Um þetta væri hægt að hafa mörg orð, en ég læt nægja að geta um einn tiltekinn þátt sem hlýtur að skipta máli við afgreiðslu máls af þessu tagi. Þessi þáttur eru þær skorður sem ræktun á erfðabreyttum lífverum setur lífrænni ræktun í næsta nágrenni.

Erfðabreytt og lífrænt rímar ekki saman
Notkun erfðabreyttra lífvera eða afurða þeirra er bönnuð í lífrænni ræktun. En þar með er ekki öll sagan sögð. Í reglum bresku vottunarstofunnar Soil Association fyrir lífræna ræktun kemur fram, að séu erfðabreyttar lífverur ræktaðar í minna en 6 mílna fjarlægð (9,6 km) þurfi sá sem sækir um lífræna vottun á framleiðslu sína að tilkynna um þetta nábýli og í framhaldinu að fara í gegnum sérstakt áhættumat, þar sem skoðað er hvort erfðabreytt efni geti hugsanlega mengað framleiðsluna og þannig komið í veg fyrir að unnt sé að votta hana sem lífræna. (Umræddar reglur er hægt að nálgast á http://www.soilassociation.org/LinkClick.aspx?fileticket=U4dYxI6QZqw%3d&tabid=353, sjá kafla 3.6).

10 km áhættusvæði?
Evrópskar vottunarstofur fyrir lífræna ræktun fylgja allar sömu reglum í öllum aðalatriðum. Verði ræktun erfðabreyttra lífvera leyfð á Kleppjárnsreykjum, þýðir þetta því að öllum líkindum að aðilar sem staðsettir eru innan við 10 km frá Kleppjárnsreykjum og vilja fá lífræna vottun á framleiðslu sína, þurfa að sæta sérstöku áhættumati. Það þýðir ekki að þeir geti ekki fengið vottun, en hins vegar er ljóst að þeir eru ólíklegri til þess en framleiðendur á öðrum svæðum og þurfa væntanlega að bera meiri kostnað.

Þrengir að lífrænni ræktun á Varmalandi
Eins og sést á meðfylgjandi korti af www.ja.is (neðst í þessari færslu) liggja nokkur mikilvæg ræktunarsvæði í Borgarfirði, þ.á.m. Varmaland, í innan við 10 km fjarlægð frá Kleppjárnsreykjum. Þó að hugsanleg ræktun á erfðabreyttum lífverum á Kleppjárnsreykjum útiloki ekki að bændur á Varmalandi fari út í lífræna ræktun, þá gerir hún þeim augljóslega erfiðara fyrir en ella.

Sem sagt: Stefnumótandi ákvörðun!
Þetta er ein ástæða af mörgum fyrir því að líta verður á það sem stefnumótandi ákvörðun af hálfu sveitarstjórnar að lýsa sig fylgjandi eða mótfallna því að leyfð verði ræktun á erfðabreyttum lífverum innan marka sveitarfélagsins. Auðvitað er það lágmarkskrafa að slík ákvörðun, eins og allar aðrar ákvarðanir á vettvangi sveitarstjórnar, séu teknar með þeim hætti sem gert er ráð fyrir í þeim lögum og reglum sem viðkomandi stjórnvald starfar eftir. Og vegna eðlis málsins er full ástæða til þess að gefa sér tíma til að kanna sem flestar hliðar þess, jafnvel enn lengri tíma en þá tvo sólarhringa sem þurfa að líða frá því að fundur er boðaður með dagskrá og þangað til hann er haldinn.

Lokaorð
Ég endurtek því lokaorð mín úr umræddu bloggi: Úrbóta er þörf í stjórnsýslu Borgarbyggðar! Gaman væri líka að heyra hvort ég sé einn um þá skoðun, eða hvort einhverjum öðrum þyki e.t.v. ástæða til að hafa áhyggjur af málinu í ljósi þess sem hér hefur verið rakið. Á þeim dögum sem liðnir eru frá því að margnefnd bloggfærsla birtist, hefur enginn minnst orði á málið svo ég hafi heyrt eða séð, ef frá er talinn efsti maður á lista Samfylkingarinnar í Borgarbyggð fyrir sveitarstjórnarkosningarnar 29. maí nk. Henni kann ég bestu þakkir. Vissulega á ég enga heimtingu á að fólk rjúki upp til handa og fóta út af einu einasta bloggi. Geri mér heldur engar grillur um slíkt. En ég er þakklátur fyrir hverja hreyfingu sem bendir til þess að fólki sé ekki sama.

Hringurinn á myndinni afmarkar það svæði sem liggur nær Kleppjárnsreykjum en 10 km.

Einkunn

Lýðheilsa og skipulag - fyrirlestraröð um skipulagsmál í Norræna húsinu

Nú er komið að lokadeginum í þriggja daga málþinginu “Lýðheilsa og skipulag” Síðustu tvo miðvikudaga voru flutt áhugaverð og fræðandi erindi sem gáfu af sér mjög skemmtilegar og lifandi umræður.

Forsaga málþingsins er að á HönnunarMarsi 2009 var haldið í Ráðhúsi Reykjavíkur þriggja daga málþing sem bar sama heiti.  Vegna fjölda áskorana var ákveðið að endurtaka leikinn.

Nú er komið að lokadeginum og að þessu sinni verða flutt 8 erindi.

Flytjendur í dag miðvikudaginn 28. apríl kl 17:00-19:30 eru :

• Dofri Hermannsson varaborgarfulltrúi - Græn samgöngustefna Grafarvogs
• Arnar Þór Jónsson arkitekt Skriðuklaustur - Leiðin að BREEAM vottun
• Kolbrún Þóra Oddsdóttir landslagsarkitekt - Má minnka loftmengun meðfram vegum?
• Magnús Jensson arkitekt - Dýrafjörður
• Sylgja Dögg Sigurjónsdóttir, B.Sc. líffræði og MPH nemi
• Egill Guðmundsson arkitekt - Umhverfisvæn byggð - skipulag og hönnun „hvert stefnum við“
• Kolbrún S. Jónsdóttir hjá Umhverfisstofnun - Landnotkun og sjálfbær þróun
• Árni Davíðsson frá Landssamtökum hjólreiðamanna - Hjólreiðar á Íslandi

Málþingið er haldið af Arkitektafélagið Íslands í samstarfi við Félag íslenskra landslagsarkitekta, Umhverfisráðuneytið og Norræna húsið.

Einkunn

Samningur um Fuglafriðlandið endurnýjaður

Á Degi umhverfisins, sl. sunnudag, endurnýjaði Sveitarfélagið Árborg samning sinn við Fuglavernd um umsjón og mótun Fuglafriðlandsins í Flóa.

Fuglafriðlandið er orðið þekkt hjá fuglaskoðurum víðsvegar um heiminn og á sumrin er stöðugur straumur fuglaáhugamanna sem gera sér ferð þangað að njóta fuglanna og umhverfisins.

Hafist var handa við gerð fuglaskoðunarskýlis fyrir nokkrum árum og var lokið við það í fyrra. Jóhann Óli vígði skýlið formlega við athöfnina á sunnudag.

Framtíðaráform fyrir Friðlandið er í mótun og er stefnt að því að bjóða  þar uppá fuglaskoðun fyrir almenning, fuglaljósmyndara og fuglaáhugafólk.  Jafnfram verður haldið áfram að endurheimta votlendi á svæðinu, en endurheimtuaðgerðir hófust árið 1997.  Þær hafa tekist mjög vel; fuglalíf hefur tekið kipp á endurheimtu svæðunum og sem dæmi má nefna, að lómavarp hefur margfaldast á þessum tíma.

Ragnheiður Hergeirsdóttir bæjarstjóri og Jóhann Óli Hilmarsson, formaður Fuglaverndar, skrifaðu undir samninginn. Samningur um samstarf í Fuglafriðlandi var fyrst undirritaður á Eyrarbakka 1997.

Ljósmynd: Lóuungi, Guðrún Tryggvadóttir.

Einkunn

Eldhugi og náttúrufræðingur - málþing til heiðurs Ingva Þorsteinssyni áttræðum

Náttúrufræðingurinn Ingvi Þorsteinsson fagnar um þessar mundir áttatíu ára afmæli. Ingvi hefur um áratuga skeið helgað störf sín gróðurvernd og landgræðslu og var hann m.a. einn af stofnendum Landverndar og sat þar lengi í stjórn. Ennfremur átti hann frumkvæði að stofnun Gróðurs fyrir fólk í landnámi Ingólfs. Þekktastur er Ingvi fyrir að hafa haft veg og vanda að kortlagningu gróðurs á Íslandi og Grænlandi. Margar greinar og rit um landgræðslu, gróðurvernd og önnur náttúruverndarmál liggja eftir Ingva. Náttúrufræðingurinn Ingvi hefur alla tíð sinnt sínum störfum af mikilli ástríðu og hefur hann öðrum fremur haft lag á að hrífa með sér fólk málstað náttúruverndar til framdráttar.

Til heiðurs þessum afkastamikla eldhuga standa Landvernd, Náttúrufræðistofnun, Landgræðslan, Landbúnaðarháskóli Íslands og Gróður fyrir fólk í landnámi Ingólfs nú fyrir málþingi í Norræna húsinu á fimmtudag 29. apríl.
Þingið hefst kl. 14.00 á aðalfundi Gróðurs fyrir fólk. Klukkustund síðar kl. 15.05 hefst almenn dagskrá þar sem flutt verða erindi til heiðurs Ingva um gróðurrannsóknir og gróðurvernd.

Dagskrá málþingsins:

15:05 Hver er Ingvi Þorsteinsson? Björn Sigurbjörnsson
15:15 Gróðurrannsóknir Ólafur Arnalds
15:40 Gróðurkortagerðin Guðmundur Guðjónsson
16:00 Gróðurvernd Sveinn Runólfsson/Andrés Arnalds
16:20 Frjáls félagasamtök Árni Bragason
16:35 Umræður
17:00 Svandís Svavarsdóttir umhverfisráðherra hefur síðasta orðið

Fundarstjóri Björn Sigurbjörnsson

Einkunn