Náttúran.is

Ford Focus rafbíllinn hlaut Green Car Vision verðlaunin

Ford Focus rafbíllinn hlaut í vikunni Green Car Vision verðlaunin á bílasýningunni í Washington. Það er Green Car Journal tímaritið sem veitir verðlaunin þeim bíl sem þykir vera mest lýsandi fyrir samgöngur framtíðarinnar, en er ekki enn fáanlegur á almennum markaði. Ford Focus rafbíllinn er væntanlegur á almennan markað í lok 2011.
Rafbílar eru afar vistvænir í notkun þar sem þeir gefa ekki frá sér neitt koldíoxíð, enda knúnir af rafmótor. Rafmótorinn fær afl sitt úr rafhlöðum sem hlaðnar eru heimavið eða á sérstökum hleðslustöðvum.

Bílaframleiðendur keppast nú við að þróa nýja rafbíla, og nýta til þess þekkinguna sem hlaust af þróun fyrstu kynslóð rafbíla á tíunda áratugnum. Rafbílar eru sérstaklega ódýrir í rekstri og eru margfalt ódýrari í rekstri en bílar sem ganga fyrir annars konar orku.
Sjá nánar á; www.green.autoblog.com

www.greencar.com.

Einkunn

Driving Sustainability ráðstefnan haldin í Reykjavík í fjórða sinn

Ráðstefnan Driving Sustainability verður nú haldin fjórða árið í röð dagana 16.-18. september nk. á Hótel Nordica.

Chris Bangle fyrrverandi hönnunarstjóri BMW, Chris Paine leikstjóri Who Killed the Electric Car?, Jim Motavalli rithöfundur og blaðamaður og “framtíðarfrömuðurinn” Rohit Talwar leggja línurnar í líflegri umfjöllun um framtíðina og hvað við getum gert í dag til að hafa jákvæð áhrif á samgöngu- og orkumál framtíðar.

„Driving Sustainability ráðstefnan er vettvangur fyrir metnaðarfullar og skynsamlegar lausnir í samgöngum sem byggja á þekkingu og skilningi á framtíðinni. Markmiðið er að nota íslenska orku í samgöngum og að Reykjavík verði þannig fyrirmynd annarra borga“, segir í tilkynningu frá aðstandendum ráðstefnunnar. Það er auðvitað vonandi að slíkt verði raunin en slíkar yfirlýsingar hafa að sjálfsögðu verið gefnar út áður en því miður gerist lítið í raunverluleikanum. Á Driving Sustainability ráðstefnunni 2008 undirritaði Össur Skarphéðinsson t.a.m. viljayfirlýsingu um samstarf við Mitsubishi-samsteypuna um innleiðingu rafmagnsbíla og þjónustunets hér á landi. Síðan hefur lítið gerst. Það er vonandi að fjórða ráðstefna Driving Sustainability verði til þess að hjólin fari að snúast á vistvænni hátt í raunveruleikanum.

Skráning á ráðstefnuna fer fram á drivingsustainability.org.

Ljósmynd: Reva rafbíllinn á fyrstu sýningu Driving Sustainability í Perslunni sem haldin var samfara ráðstefnunni 2007. Ljósmynd: Guðrún Tryggvadóttir.

Einkunn

Visthæfari Elding

Nú hefur Elding bætt vetnisbíl í bílaflotann sinn en í síðastliðinni viku afhendu Íslensk NýOrka og Brimborg 10 efnaraflabíla af gerðinni Ford Fókus FCV. Þessir bílar hafa verið notaðir áður en Ford valdi Ísland til að ná hámarksnotkun á þessari kynslóð efnaraflabíla sinna. Katrín Júlíusdóttir, iðnaðarráðherra, var viðstödd afhendinguna og nefndi að hið opinbera og sveitarfélög muni taka höndum saman til að hvetja fyrirtæki og almenning til að nýta innlenda orku í samgöngum á allra næstu mánuðum. Notkun vetnisbílsins er eitt skref í átt að visthæfari samgöngum hjá Eldingu.

Elding /Hvalaskoðun Reykjavik hefur tileinkað sér umhverfisstefnu í sínum rekstri frá árinu 2006 til að geta stuðlað að sjálfbærri uppbyggingu til framtíðar*. Eitt af markmiðum fyrirtækisins er að nota visthæfari samgöngutæki en Elding hefur verið þátttakandi í tilraunaverkefninu SMART H2 (Sustainable marine and road transport - hydrogen in Iceland) sem felur í sér notkun vetnis um borð í farþegaskipi og bifreiðum. 

Nánari upplýsingar um vetnisbílana er að finna á www.newenergy.is.

*Sjá nánar um Eldingu hér á Grænum síðum.

Einkunn

Íslendingar hafa áður skoðað orkumál sín í kjölfar kreppu segir iðnaðarráðherra

Iðnaðarráðherra, Katrín Júlíusdóttir, afhenti í dag Ford Focus FCV vetnisrafbíla til notenda sem munu taka þátt í stóru vetnisverkefni á næstunni. Um er að ræða fyrirtækin Brimborg, Íslenska Nýorku, Keili, Orkuveitu Reykjavíkur, Landsvirkjun, Icelandic Hydrogen, Eldingu hvalaskoðun, Nýsköpunarmiðstöð og Skeljung. Fyrirtækin munu nota vetnisrafbílana daglega, við krefjandi aðstæður svo hægt sé að safna upplýsingum um eiginleika vetnisrafbíla í daglegri notkun.

Brimborg og Íslensk NýOrka hafa fylgst með umræðu um visthæfa bíla um nokkurt skeið. Róttækra aðgerða er þörf ef draga á úr mengandi útblæstri. Nýleg yfirlýsing tíu helstu bílaframleiðenda heims um að vetnisrafbílar verði komnir í framleiðslu fyrir almennan neytendamarkað árið 2015 eða fyrr undirstrikar þetta en þörf er á að stjórnvöld, orkufyrirtæki, olíufyrirtæki og bílaframleiðendur sameinist um að byggja upp dreifikerfi á næstu árum fyrir vetnisrafbíla. Í máli ráðherra kom fram að Íslendingar hafi áður bylt orkunotkun sinni

Höfum áður snúið vörn í sókn í kreppu

Katrín Júlíusdóttir iðnaðarráðherra sagði að afhending vetnisbílanna væri ánægjulegur viðburður og nauðsynlegt skref í að prófa almenna notkun og endingu tækninnar. Ráðherra sagði að Íslendingar hafi áður sýnt mikinn dugnað mitt í niðursveiflu, meðal annars hafi hitaveituvæðing landsins farið í gang í kjölfar kreppu. „Nær alger útrýming olíubrennslu til húshitunar með hitaveituvæðingu landsins var gífurlegt átak sem hófst í kjölfar kreppu. Erfitt er að ímynda sér gjaldeyrissparnaðinn eða jákvæð áhrif á umhverfi og lífsgæði sem þetta átak hefur skilað okkur í gegnum árin. Ég tel að í kjölfar þeirrar kreppu sem nú gengur yfir heiminn eigum við Íslendingar að snúa okkur að þeim geira þar sem við getum í raun dregið úr brennslu kolefnaeldsneytis og aukið hlut innlendra visthæfra orkugjafa. Hér er ég vitaskuld að tala um samgöngurnar.

Iðnaðarráðuneytið, í samvinnu við Vistorku, ráðuneyti umhverfis- og samgöngumála og Reykjavíkurborg, vinnur að formlegu átaki um orkuskipti í samgöngum, úr innfluttu jarðefnaeldsneyti og yfir í visthæfa innlenda orkugjafa. Í undirbúningi er stofnun klasasamstarfs þeirra fjölmörgu aðila sem sinna rannsóknum, þróun og framleiðslu á innlendum orkugjöfum fyrir bifreiðar og skip, bílgreinina og olíufélög sem vilja koma upp fjölorkustöðvum. Hugmyndin er að ýta undir þróunina með markvissum aðgerðum en reyna ekki að miðstýra því hvaða lausn verður ofan á heldur láta innlenda og erlenda tækniþróun og markaðinn sjálfan ráða því. Í stað þess að setja óraunhæf markmið viljum við draga fram allt það merka starf sem þegar er unnið af fjölda aðila.

Stefnt er að því að Ísland geti á komandi árum orðið leiðandi í tilraunum og framleiðslu á vistvænum orkugjöfum, m.a. með stuðningi við rannsóknir, þróun og uppbyggingu innviða.
Þetta átak verður kynnt formlega á næstu vikum. Næsta átak er tímabært og þar er til mikils að vinna. Við höfum sett okkur metnaðarfull markmið í losunarmálum og allir sem vinna að því að skipta út innfluttu jarðefnaeldsneyti í visthæfa innlenda orkugjafa geta tengst og kynnt það sem er í gangi“ sagði Ráðherra.

Iðnaðarráðherra þakkaði Brimborg og Íslenskri Nýorku frumkvæðið og lagði áherslu á að verkefni sem þessi væru atvinnuskapandi, gjaldeyrissparandi og í þágu umhverfisins

Einkunn

Harðkornadekk

Þar sem veturinn nálgast óðfluga er tilvalið að birta upplýsingar um harðkornadekk, sem koma í stað nagladekkja. Meðal þeirra sem hafa staðið að þróun harðkornadekkja er fyrirtækið Nýiðn hf.

Harðkornadekk eru einkum ætluð til vetraraksturs en hins vegar er ekkert því til fyrirstöðu að nota þau allt árið. Harðkornadekk fara sérstaklega vel saman með notkun ABS hemlakerfis og njóta sín best miðað við önnur dekk við erfiðustu hálkuskilyrði. Harðkornin (silicium carbide og aluminiumoxide) eru gjarnan notuð sem iðnaðardemantar og sem slík eru þau fest í fræsihjól og tennur m.a. til málmvinnslu. Við framleiðslu harðkornadekkja er kornunum dreift jafnt í allt gúmmíðið. Jöfn dreifing kornanna í allt slitlag hjólbarðans veldur því að ávalt koma ný harðkorn í stað þeirra sem hverfa þegar hjólbarðinn slitnar.

Samkvæmt rannsókn sem gerð var af þekktri stofnun í Þýskaland þá valda nagladekk 14 sinnum meiri skaða á gatnakerfinu en harðkornadekk. Önnur sænsk rannsókn staðfestir að venjuleg fólksbifreið sem ekur á nagladekkjum rífur upp 27 grömm af vegefni á hvern ekinn km. Það samsvarar 15-20.000 rúmmetrum af malbiki og steypu á ári Stór-Reykjavíkursvæðinu. Stór hluti af þessu efni eru tjöruleifar sem svífa um og valda áþreifanlegri loftmengun. Sú mengun hefur verið staðfest með mælingum sem sýna að loftmengun á höfuðborgarsvæðinu eykst verulega á svokölluðu naglatímabili. Þekkt eru áhrif tjörugufu á starfsmenn sem vinna við malbikun. Hver skyldu áhrif tjörumengunar af völdum nagladekkja vera á höfuðborgarbúa?

Mæling sem gerð var af Stefáni Guðjohnsen hljóðsérfræðingi hjá Hljóð ehf leiddi í ljós að hávaði sem framkallast af fólksbíl á nagladekkjum er 4 desibelum (2,5 sinnu) meiri en af samskonar bíl á sama hraða með sambærilegum ónegldum dekkjum.

Sama tilraun var gerð fyrir harðkornadekk og kom í ljós að engin munur er á hávaðamengun af völdum harðkornadekkja og sambærilegra ónegldra dekkja. Bílnum var ekið á 61 km hraða í öllum tilvikum. Vindur var mjög lítill. Hávaði af völdum nagladekkja með svokölluðum létt-nöglum var einnig mældur. kom í ljós að hávaði af völdum léttnagla er síst minni en af völdum þyngri nagla.

Hvað varðar notkun á harðkornadekkjum er mikilvægt að aka 500 til 1000 km á auðum vegi til þess að ná fram sem bestri virkni harðkornadekkja. Ónotað harðkornadekk hefur þunna gúmmíhimnu yfir kornunum í fyrstu, hún hverfur fljótt við notkun.

Eins og sagt var frá hér að ofan koma ný harðkorn í ljós eftir því sem slitbani hjólbarðans eyðist. Þetta gefur harðkornadekkjum mikla yfirburði yfir önnur dekk sem missa eiginleika sína jafnt og þétt eftir því sem þau slitna. Sérstaklega á þetta við um virkni nagladekkja, enda sýna prófanir að nagladekk sem búið er að rúlla 10.000 km er búið að missa 85% af virkni sinni sem nagladekk.

Einkunn