Náttúran.is

Vöruleit Náttúrunnar

Vörurleitin á Náttúrumarkaði gefur þér kost á að þrengja leitina til að finna vörur sem uppfylla þær kröfur sem þú gerir til framleiðanda, merkingar eða viðurkenndrar vottunar. Sjá hér til hægri undir Vöruleit á Náttúrumarkaði. Vöruleitin nýtist vel til vistvænna innkaupa opinberra aðila jafnt sem fjölskyldunnar.

Allar vörur sem skráðar eru á Náttúrumarkað koma upp í Vöruleit, hvort sem þær eru til sölu eða einungis skráðar til kynningar. Hver sem er getur óskað eftir skráningu á vöruframboði sínu á Náttúrumarkað og þannig tekið þátt í því að bjóða kaupendum upp á að bera saman breitt úrval af vörum út frá vistvænum sjónarmiðum. Sjá nánar um verð á skráningum hér að neðan.

Auk þess tengjast vörurnar ítarefni um innihaldsefni, umhverfisviðmið, endurvinnsluleiðir auk þess að tengjast fréttum um viðkomandi vöru, framleiðanda og aðra tengda aðila.

F - kubbur fyrir vörur á Náttúrumarkaði - vöruskráningu fylgir auglýsingabirting í slembivali

Verð á 12 mánaða skráningu vöru á Náttúrumarkað:

1 - 3 vörur - skráning á vöru (til sölu) 4.900*. Á vöru til kynningar (ekki til sölu) 9.800*
4 - 10 vörur - skráning á vöru (til sölu) 3.920*. Á vöru til kynningar (ekki til sölu) 6.840*
11 vörur eða fl. - skráning á vöru (til sölu) 3.330*. Á vöru til kynningar (ekki til sölu) 6.600*

*Öll verð í íslenskum krónum, án vsk. 50% afsláttur er af framlengingu skráningar eftir fyrsta árið.

Einkunn

Umhverfisviðmið fyrir fyrirtæki

Hvað eru umhverfisviðmið?

Umhverfisviðmið eða markmið eru í eðli sínu ekkert frábrugðin fjárhagslegum markmiðum. Hlutverk beggja er að mæla árangur af starfssemi fyrirtækisins á mismunandi sviðum, þó svo að auðveldlega sé hægt að fullyrða að fjárhagleg og umhverfismarkmið séu hvert öðru háð. Það er þó einn grundvallarmunur á fjárhaglegum og umhverfislegum markmiðum. Hin fjárhagslegu hafa þróast í fjölda áratuga eða árhundruði meðan umhverfislegu markmiðin eru tiltölulega ný á nálinni og fyrirtæki byrjuðu ekki að setja umhverfisviðmið í einhverjum mæli fyrr en eftir 1996 þegar ISO 14001 staðallinn var fyrst samþykkur.

Þessi grundvallarmunur á umhverfis- og fjárhagslegum markmiðum hefur hins vegar mikla praktíska þýðingu. Bókhaldsforrit fyrirtækja miðast að því að fylgjast á auðveldan máta með fjárhagslegum lykiltölum. Kerfin eru byggð með það í huga að geta á auðveldan og fljótan máta fá út allar helstu fjárhagslegu viðmið sem hægt er þar sem upplýsingar skipta öllu í hörðum heimi samkeppninnar. Umhverfisupplýsingar eru ekki á innbyggðar í upplýsingakerfi fyrirtækja eins og fjárhagslegar upplýsingar.

Að skilgreina umhverfismarkmið er í sjálfu sér ekki erfitt. Hið flókna er að skilgreina hvar og hvernig auðveldast er að safna saman upplýsingum úr upplýsingakerfinu. Þar sem umhverfisupplýsingar eru oft af skornum skammti hefur fólk því tilhneigingu að mæla það sem hægt er að mæla í stað þess að mæla það sem er mikilvægt. Grunnur að öllum viðmiðum er að þekkja núverandi stöðu (grunnstöðuna) áður en viðmiðin eru sett. Án þess að þekkja grunnstöðuna er afskaplega erfitt að vita hvort markmiðum hafi verið náð. Að ekki vita grunnstöðuna er líklega algengustu mistök sem fyrirtæki gera við markmiðasetningu. Markmiðin verða því oft ekkert annað en fallegur ásetningur án þess að hægt sé að segja til um hvort þeim hafi verið náð eða ekki. Grundvallaratriðið í allri markmiðasetningu er því að skilgreina grunnstöðu áður en markmið eru sett.

Einkenni góðra umhverfisviðmiða:

Einkunn

Gleðidagur: Nú fæ ég loks að vita það!

Í gær tók loksins gildi Reglugerð nr. 1038/2010 um merkingu og rekjanleika erfðabreyttra matvæla og erfðabreytts fóðurs, þ.e.a.s. hvað matvælin varðar. Upphaflega átti reglugerðin öll að taka gildi 1. september sl., en þáverandi sjávarútvegs- og landbúnaðarráðherra frestaði gildistöku matvælahlutans á síðustu stundu fram til 1. janúar 2012, að því er virðist vegna þrýstings frá Jóni Geraldi Sullenberger, eiganda matvöruverslunarinnar Kosts og einhverjum fleiri innflytjendum og seljendum matvæla frá Bandaríkjunum.

Upplýsingar en ekki boð og bönn!
Ég held að einhverjir hafi misskilið þýðingu umræddrar reglugerðar. Málið snýst alls ekki um að banna sölu á erfðabreyttum matvælum, heldur aðeins um að upplýsa neytendur um það hvort tiltekin matvæli innihaldi erfðabreytt efni. Málið er því réttlætismál fyrir neytendur, hvort sem þeir vilja erfðabreytt á diskinn sinn eða ekki.

Íslendingar ekki lengur eftirbátar annarra Evrópuþjóða
Með gildistöku reglugerðarinnar hafa íslenskir neytendur loksins öðlast sama rétt og neytendur í öðrum löndum Evrópu hvað merkingar og rekjanleika erfðabreyttra matvæla varðar. M.a. þess vegna finnst mér gærdagurinn gleðidagur!!!

En samt finn ég engar merkingar
Það veldur mér reyndar pínulitlum áhyggjum að í könnunarferð í Nettó í Borgarnesi í dag fann ég ekki eina einustu matvöru sem innihélt erfðabreytt efni, svo séð væri. Þetta getur átt sér þrjár mismunandi skýringar:

1. Matvörurnar sem ég skoðaði voru raunverulega allar lausar við erfðabreytt efni.
2. Framleiðendur og seljendur hafa svikist um að merkja vörurnar.
3. Gildistöku reglugerðarinnar hefur verið frestað aftur án þess að ég tæki eftir því.

Ég þykist nú þegar hafa útilokað þriðju og síðustu skýringuna með því að fletta í gegnum allar reglugerðir sjávarútvegs- og landbúnaðarráðuneytisins síðustu mánuði og til dagsins í dag. Hinar tvær þykja mér báðar ósennilegar. Ég veit með öðrum orðum ekki alveg hvað er hér á seyði.

Hvað getum við gert?
Neytendur sem hafa rökstuddan grun um að matvæli  sem ekki eru merkt samkvæmt framanskráðu innihaldi engu að síður erfðabreytt efni, ættu að biðja framleiðendur eða seljendur að að leggja fram gögn sem staðfesta fjarvist slíkra efna, í samræmi við ákvæði reglugerðarinnar. Væntanlega geta heilbrigðisnefndir sveitarfélaga undir yfirumsjón Matvælastofnunnar liðsinnt fólki hvað þetta varðar, en þessar stofnanir fara með eftirlit með því að ákvæðum reglugerðarinnar sé framfylgt.

Meira lesefni af bloggsíðu Stefáns Gíslasonar:
- Bloggpistillinn Á morgun fæ ég að vita það 31. ágúst 2011
- Bloggpistillinn Ísland er land þitt 1. september 2011
(Í þessum pistlum eru m.a. tenglar á umræddar reglugerðir)

Einkunn

IKEA stefnir að því að vera sjálfbær í orkuframleiðslu

IKEA í Bretlandi hefur keypt 12MW vindorkubú og hefur í hyggju að setja upp 39 þúsund sólarrafhlöður á verslunum sínum og stefnir að því að nota 100% endurnýjanlega orku, úr eigin framleiðslu. Sænska húsbúnaðarrisakeðjan í Bandaríkjunum hefur nýlega aukið við sólarrafhlöður sínar í Kaliforníu og einnig á austurströndinni, og hefur gefið yfirlýsingar um, skv. Market Watch, að sólarrafhlöður muni vera settar upp í IKEA verslunum í suðurhluta Bandaríkjanna. Það þýðir að 75% af IKEA verslunum í Bandaríkjunum verði knúnar með raforku úr eigin framleiðslu, og áhugavert að IKEA hyggst eiga sólarrafhlöðurnar sjálf frekar en að leigja þær af raforkuframleiðendum.

Miðað við vel kynntar yfirlýsingar IKEA um óöryggið sem vaxandi orkuverð í nánustu framtíð getur haft í för með sér, gæti þessi stefna IKEA haft mikil áhrif á önnur stórfyrirtæki, í framfaraátt. Hvaða risaverslunarkeðjur munu vera næstar til að taka við sér og innleiða græna stefnu í orkumálum sínum?

Einkunn

200 starfsmenn skrifa undir samgöngusamning Landsbankans

Tæplega 200 starfsmenn Landsbankans hafa nú undirritað samgöngusamning bankans frá því hann var samþykktur í júní. Þeir starfsmenn sem undirrita samninginn skuldbinda sig til að ferðast með strætó eða hjólandi til og frá vinnu og í vinnutengdum erindum ef möguleiki er á. Á móti greiðir bankinn útlagðan kostnað, að hámarki 40.000 krónur á ári, auk þess að greiða leigubílakostnað í neyðartilvikum. Ennfremur býðst öllu fastráðnu starfsfólki 20.000 króna endurgreiðsla af árskorti í strætó. Í bankanum starfa nú um 1250 manns og þar af starfa um 850 starfsmenn í höfuðstöðvum bankans í miðborg Reykjavíkur.

Samgöngusamningurinn er hluti af samfélagsstefnu bankans. Í henni kemur m.a. fram að bankinn ætli sér veigamikið hlutverk í uppbyggingu velferðar til framtíðar í íslensku samfélagi þar sem efnahags-, samfélags- og umhverfismálum er fléttað saman við starfshætti bankans. Liður í því að innleiða stefnuna er að hvetja starfsfólk að nota vistvænar samgöngur. Með þessum áherslum vill Landsbankinn leggja sitt af mörkum til að  draga úr losun gróðurhúsalofttegunda, bæta umferðarmenningu og styðja starfsmenn til betri heilsu.

Samkvæmt því sem best er vitað er um 25% af losun koltvísýrings á Íslandi vegna samgangna auk þess sem útreikningar benda til að rekstrarkostnaður fjölskyldubíls sem kostar 2,6 milljónir í innkaupum, eyðir 8 dm/100 km og er keyrður 15 þúsund km. á ári, sé um 1.080 þúsund krónur á ári (www.fib.is). Þá er miðað við eldsneytisverð 220 kr./dm3 sem er í lægri kantinum miðað við markaðsverð. Ef bíll hins vegar kostar 4.800.000 krónur við innkaup og eyðir 11 dm3/100 km þá hækkar kostnaðurinn í 1.650 þúsund á ári. Sparnaður er því umtalsverður fyrir þá starfsmenn sem eiga þess kost að nýta sér samgöngusamninginn.

Stefna Landsbankans í samfélagslegri ábyrgð skal vera orðin samþætt starfsemi bankans eigi síðar en árið 2015. Við innleiðingu á stefnunni mun Landsbankinn ráðast í fjölmörg verkefni til að laga stefnuna að starfsháttum bankans. Fyrstu verkefnin sem ráðist hefur verið í snúa að innra starfi. Á sviði samgangna hefur bankinn auk innleiðingar samgöngusamningsins kolefnisjafnað akstur og millilandaflug starfsmanna á sínum vegum frá og með árinu 2010.

Samgöngusamningur Landsbankans

Einkunn