Náttúran.is

Tökum höndum saman og stundum vistvæn innkaup!

Vistvæn innkaup snúast um að velja þá vöru sem er síður skaðleg umhverfinu og heilsu manna samanborið við aðrar vörur sem uppfylla sömu þörf og samtímis bera sama eða lægri líftímakostnað.

Til þess að auðvelda innkaup á vörum og þjónustu sem eru síður skaðleg umhverfi og heilsu hefur Náttúran.is tekið saman 11 viðmið sem spanna veigamestu þættina. Viðmiðin eru einföld og hjálpa til að nálgast markmiðið, það er að velja bestu vöruna út frá sjónarmiði heilsu, umhverfis og jafnvel félagslegum aðstæðum sem í daglegu tali eru nefnd sjálfbær þróun.

Hér í láréttu röðinni sérð þú táknmyndir fyrir viðmiðin og í lóðrettu röðinni táknmyndir ýmissa vörutegunda. Ef þú opnar flipann „Viðmið“ hér til hægri á síðunni og smellir á þessi tákn getur þú lesið þig til um hvert viðmið og vörutegund fyrir sig auk þess sem að auðvelt er að sjá hvaða viðmið eiga við hverja vörutegund þar sem viðeigandi viðmið eru sýnileg í láréttu línunni út frá vörunni.

Viðmiðin eru: Orka, eldsneyti, vatnsnotkun, ofnæmi, hættuleg efni / tilbúin efni, þungmálmar, öryggisblað, umhverfismerkingar, siðgæðisvottun, vinnuumhverfi og endurvinnsla.

Eitt eða fleiri af þessum viðmiðum eiga að meira eða minna leiti við um hverja einustu vöru. Um leið og við gerum okkur grein fyrir því eftir hverju þarf að leita til að velja vistvænstu vöruna verða vistvæn innkaup leikur einn.

En eins og með allt annað þá skapar æfingin meistarann. Jörðin okkar þolir ekki lengur þá rányrkju og vanvirðingu sem henni er sýnd í dag.

Tökum höndum saman og stundum vistvæn innkaup!

Einkunn

Grænar síður vísa veginn að fyrirtækjum með umhverfismetnað

Grænar síður™ veita yfirsýn yfir þau fyrirtæki, stofnanir, vörur og einstaka viðfangsefni sem tengjast umhverfisvitund og sjálfbærri þróun á einhvern hátt. Þú finnur ekki einungis hver er með vottun eða hefur eitthvað fram að færa á sviði umhverfisvænna starfshátta heldur tengist lesefni af síðunni við tiltekinn aðila. Gefðu þér góðan tíma til að grúska í Grænu síðunum hér á vefnum því af nógu er að taka.

Rúmlega tvöþúsund fyrirtæki og aðilar eru nú þegar skráð á Grænar síður en þ. 1. júní sl. var sendur út netpóstur til allra skráðra aðila með lykilorði og leiðbeiningum um hvernig hægt er að fara yfir skráninguna og bæta við ítarskráningum gegn vægu gjaldi. Ef þú ert í forsvari fyrir fyrirtæki og hefur áhuga á að fá skráningu á síðurnar á þeim forsendum sem settar eru um skráningar* þá hafði samband í síma 483 1500 eða skrifaðu okkur á nature@nature.is.

Grænar síður eru grunnurinn fyrir Græna Íslandskortið en það er ókeypis samfélagsleg þjónusta, Green Map flokkunarkerfisins, alþjóðlegs flokkunarkerfis Green Map® System til að skilgreina aðila/fyrirbæri í flokka sem talist geta hluti af grænum viðskiptum, menningu, náttúrunni og umhverfinu.

*Sjá nánar um Grænar síður Náttúrunnar.

Einkunn

Húsaskipti í fríinu

Á vefsíðu Húsakipta er hægt að skrá og fá húsnæði á öllu landinu. Þannig er hægt að ferðast um landið, lána sína íbúð og fá aðra lánaða.

Vefsíða Húsaskipta gerir þér mögulegt að ferðast um Ísland án þess að borga fyrir hótel eða annars konar gistingu. Hugmyndin var lögð inn á Hugmyndatorg Höfuðborgarstofu sl. vor og vakti mikla athygli. Eðli góðra hugmynda er að þær eru svo sjálfsagðar þegar þær koma fram að maður spyr sig af hverju engum hafi dottið þetta í hug fyrr. Eins er með þessa hugmynd sem þegar er búið að koma í verk.

Húsaskipti býður uppá ókeypis íbúða- og sumarhúsaskipti innanlands til lengri eða skemmri tíma. Notendur skrá inn helstu upplýsingar um húsnæði sem þeir bjóða til afnota, húsnæði sem þeir óska eftir, staðsetningu, upplýsingar um fjölskyldustærð og tímabil sem þeir hafa áhuga á íbúðaskiptum.

Tilgangurinn er að notendur geti í framhaldinu haft bein samskipti sín á milli og miðlað nánari upplýsingum.

Einkunn

Græn viðskipti

Með vitundarvakningu og þátttöku almennra neytenda er hægt að nota markaðsöflin til þess að leysa mörg af þeim umhverfisverkefnum sem heimurinn stendur frammi fyrir í dag, hvort sem þau eru staðbundin eða hnattræn.
Grænu síðurnar hjálpa þér að finna náttúrulegar og umhverfisvænar vörur og þjónustu og þau fyrirtæki sem huga að umhverfinu í starfsemi sinni.
Grænt Íslandskort sýnir þér hvar á landinu grænar lausnir eru í boði.

Einkunn

IKEA hættir að selja glóperur

IKEA hefur í hyggju að hætta að selja hefðbundnar glóperur og selja í staðinn umhverfisvænni sparperur. Dagsetning á þessu breytta fyrirkomulagi er 1. september 2010 en þá mun IKEA skipta Glöda glóperum út fyrir Sparsam orkusparandi perur og Halogen perur með skrúfgangi.

Þessi ákvörðun er í samræmi við reglugerð evrópska efnahagssvæðisins en í Ecodirective 32/2005 kveður á um að neytendum verði bent á að nota sparperur í stað glópera og sölu á glóperum verði jafnframt hætt í skrefum.

Athugið að sparperur sem og flúorperur, halogenperur og allar aðrar perur fara í sérstakan endurvinnsluflokk „Ljósaperur“ þar sem perur sem innihalda kvikasilfur fá sérstaka meðhöndlun þar sem kvikasilfrið er aðskilið frá gleri og öðru og því eytt sérstaklega. Afgangurinn fer til urðunar.

Tekið er við perum til endurvinnslu í verslun IKEA og á endurvinnslustöðvum Sorpu og endurvinnslustöðvum í Grindavík og Vogum Vatnsleysuströnd en RR-skil vinnur nú að því að innleiða tilskipun Evrópusambandsins þar sem framleiðendur/innflytjendur hafa verið gerðir ábyrgir fyrir söfnun og endurvinnslu á raf- og raftækjaúrgangi sem þeir koma í umferð.

Á vef Orkuseturs er reiknivél sem sýnir hve spara má mikið í krónum og aurum með notkun sparpera í stað glópera.

Sjá umhverfisstefnu IKEA.

Einkunn