Náttúran.is

Lífrænt hráfæði í neytendaumbúðum - viðtal við Jóhann Örn hjá Organic.is

Fyrir nokkrum vikum fékk nýtt fyrirtæk, Organic lífstíll ehf., lífræna vottun frá vottunarstofunni Tún (sjá grein) og í kjölfarið setti fyrirtækið fyrstu lífrænu hráfæðivörur sínar á markað. Það er ekki á hverjum degi sem að lífrænar hráfæðivörur eru framleiddar fyrir íslenskan markað og af því tilefni spurði Náttúran Jóhann Örn, einn eigenda fyrirtækisins nokkurra spurninga um þetta merka framtak.

Hverjir standa að Organic.is?
Kristján Kristjánsson og fjölskylda hans og Jóhann Örn Bjarnason og fjölskylda hans.

Geturðu sagt okkur frá hugmyndafræðinni á bak við viðskiptahugmyndina?
Í fyrstu var í raun aldrei nein viðskiptahugmynd. Þetta var áhugamál hjá okkur fjölskyldunum og okkur langaði að prófa þessa framleiðslu og netverslun

Hvenær byrjuðuð þið að hafa á huga á hráfæði og í framhaldi af því hvað  varð til þess að þið fóruð út í að þróa vörur og framleiða?
Höfum verið meira en minna á lífrænu grænmetisfæði frá árinu 2005 og upp úr því var byrjað að prufa hráfæðiskúra svo óx þetta smátt og smátt hjá okkur. Hráfæðiskökur eru næringarríkt góðgæti og hafa þær verið borðaðar allt að því daglega í gegnum árin. Því má segja að ómeðvituð þróun hafi verið lengi í gangi.

Hvað eruð þið að framleiða margar vörutegundir og hverjar eru þær?
Í dag erum við að framleiða 3 vörutegundir, hnetufreistingu, eplafreistingu og krakkafreistingu. Kókosfreisting og bananafreisting er svo væntanleg á markað fljótlega eftir áramót. Áætlum að setja á markað um 20 vörutegundir.

Er þetta byrjunin á einhverju miklu stærra?
Vörurnar hafa nú verið fjórar vikur á markaði og seljast vel. Hvort eitthvað stórt sé framundan verður tíminn að leiða það í ljós. Við erum uppfull af lífrænum hugmyndum J

Hvenær áætlið þið að opna vefverslunina?
Áætlað er að koma henni í gagnið sem fyrst, í allra síðasta lagi í desember.

Hvernig verður hún byggð upp?
Vefsíðan mun verða mjög aðgengileg og byggð upp á sem einfaldasta máta svo að notendur geti auðveldlega skoðað sig um á síðunni. Hún verður byggð uppá fréttum, greinum, uppskriftum, fróðleik auk vörusölunnar sjálfrar.

Munið þið koma til með að afgreiða ferskvörur í gegnum vefverslunina líka?
Nei það gengur því miður ekki.

Hvar fást vörurnar ykkar í dag?
Í dag fást þær í Heilsuhúsunum, Lifandi mörkuðum, Yggdrasil Rauðarárstíg, Fjarðarkaup, Hagkaupsverslunum, Nóatúnsverslunum, Kosti, Víði, Melabúðinni, World Class Laugum og Hreyfingu.

Hvað telur þú að standi helst í vegi fyrir því að fólk fari út í að framleiða hágæða lífrænar vörur á Íslandi í dag?
Kannski helst skortur á fjármagni og tíma hjá fólki. Þetta er tímafrek framleiðsla og gefur seint af sér. Þá gæti líka lítil þekking á lífrænum matvörum og gæðum þeirra haft eitthvað að segja.

Hvaða ráð gefur þú öðrum sem dreymir um að láta verða af viðskiptahugmyndum sínum?
Hætta að hugsa og framkvæma.

Kærar þakkir Jóhann og gangi ykkur sem allra best!

Ljósmyndir: Efsta myndin er af Jóhanni Erni við framleiðsluna en neðri myndirnar sína Hnetufreistingu, með og án umbúða en umbúðirnar eru 100% niðurbrjótanlegar, úr maíssterkju og sykurreyr.

Einkunn

Bústólpi ehf. fær vottun til lífrænnar framleiðslu á kjarnfóðri til lífrænnar búfjárræktar

Vottunarstofan Tún hefur staðfest að fyrirtækið Bústólpi ehf. uppfylli kröfur um lífrænar aðferðir við framleiðslu á kjarnfóðri. Vottorð þessa efnis verður formlega afhent í vinnslustöð fyrirtækisins á Akureyri þann 14. desember 2010.

Bústólpi ehf. er fyrsta sérhæfða kjarnfóðurfyrirtækið hér á landi sem hlýtur vottun til lífrænnar framleiðslu á kjarnfóðri.

Með vottun Túns er staðfest að Bústólpi ehf. noti viðurkennd hráefni við framleiðslu á hinu vottaða kjarnfóðri, að lífræn hráefni séu á öllum stigum vinnslu aðgreind öðrum efnum og afurðum, að aðferðir við úrvinnslu og blöndun samræmist reglum um lífræna framleiðslu, og að gæðastjórnun, skráningar og merkingar uppfylli settar kröfur.

Sjá; Vottað lífrænt - Tún.

Fyrirtækið Bústólpi ehf. er löngu landsþekkt fyrir framleiðslu á fóðri fyrir nautgripi, sauðfé, svín, hross og alifugla, sem selt er í lausu og í sekkjum. Auk þess selur fyrirtækið sáðvöru, áburð og fleiri rekstrarvörur til landbúnaðar.

Bústólpi ehf. hefur nú hafið nýtingu á lífrænu íslensku byggi til framleiðslu á kjarnfóðri fyrir lífræna nautgriparækt.
„Þessi vottun hefur mikla þýðingu fyrir Bústólpa þar sem hún gerir fyrirtækinu kleift að þjónusta einnig þá vaxandi sprotagrein sem lífrænn landbúnaður er“, segir Hólmgeir Karlsson framkvæmdastjóri fyrirtækisins.

Lífræn framleiðsla á Íslandi
Hér á landi stunda nú að jafnaði á milli 60 og 70 aðilar vottaða lífræna ræktun, vinnslu lífrænna hráefna og söfnun náttúruafurða. Þessir aðilar framleiða nokkur hundruð tegundir vottaðra afurða fyrir markað hérlendis og í vaxandi mæli einnig til útflutnings.

Framleiðsla á vottuðu lífrænu kjarnfóðri er forsenda þess að búfjárrækt sem byggir að hluta eða öllu leyti á aðfengnum fóðurefnum geti tileinkað sér lífrænar aðferðir.

Vottaðar lífrænar afurðir og náttúruafurðir hafa þá sérstöðu á markaði að allur ferill þeirra, frá ræktun eða söfnun hráefna, til pökkunar í neytendaumbúðir eða afhendingar í lausu, er undir eftirliti óháðs aðila, þ.e. vottunarstofu sem fylgist með því að uppruni og meðferð afurðanna sé í samræmi við alþjóðlegar og íslenskar kröfur um lífræna framleiðslu.

Vottunarstofan Tún hóf vottun lífrænna afurða á Íslandi árið 1996 og í Færeyjun árið 2006. Síðan þá hafa yfir 80 bændur og fyrirtæki hlotið vottun. Auk þess vottar Tún nú framleiðslu átta fyrirtækja á náttúruvörum og aðföngum til lífrænnar framleiðslu.

Sjá yfirlit yfir aðila með lífræna vottun frá Túni hér á Grænum síðum.

Einkunn

Vottuð náttúruafurð - Tún

Upprunavottun. Vottuð náttúruafurð eru þær afurðir skilgreindar sem ekki teljast lífrænar en eru af náttúrulegum uppruna, eru framleiddar með sjálfbærri nýtingu auðlindar, eru leyfileg aðföng í lífræna framleiðslu, og eru meðhöndlaðar frá söfnun til síðustu pökkunar eða merkingar eins og um lífrænar afurðir væri að ræða.

Sjá nánar á vef vottunarstofunnar Túns.

Einkunn

Oddi kynnir Svansmerktan gPóst

gPóstur er hagkvæm lausn fyrir fyrirtæki sem prenta efni til dreifingar í miklu magni, eins og reikninga, yfirlit, launaseðla, markpóst o.fl. gPóstur sparar umtalsverðan kostnað sem fellur til vegna viðhalds tækja, dreifingar og vinnustunda.

Lokur eru helsta viðbótin við gPóstinn. Lokur eru umslagalaus póstur sem notar helmingi minna magn pappírs samanborið við hefðbundinn póst í umslagi og er góður kostur fyrir fyrirtæki sem vilja sýna samfélagslega ábyrgð með að huga að umhverfinu. Með því að minnka það pappírsmagn sem notað er er stuðlað að minni orkunotkun sem verður til vegna framleiðslu, förgunar  og dreifingar. Lokur eru með norrænu umhverfismerkinguna Svaninn sem þýðir að leitast er við að draga úr umhverfisáhrifum á flestum stigum framleiðslunnar.
Upplýsingar eru prentaðar innan á Lokuna og hún svo (gufu) límd aftur. Hægt er að setja einblöðung eða bækling inn í Lokuna. Loka sem inniheldur 12 bls. bækling vegur undir 20 gr og  fellur inn í ódýrasta verðflokk Íslandspósts.

Prentsmiðjan Oddi hlaut í byrjun árs Svansmerkingu og starfar því eftir strangri umhverfisstefnu þar sem i hvívetna er leitast við að fara vel með hráefni og draga úr umhverfisáhrifum rekstrarins á skilvirkan hátt.
Lokur er hagkvæm lausn fyrir fyrirtæki sem prenta efni til dreifingar í miklu magni, eins og reikninga, yfirlit, launaseðla, markpóst ofl. gPóstur sparar umtalsverðan kostnað sem fellur til vegna viðhalds tækja, dreifingar og vinnustunda.
Oddi tekur við gögnum á rafrænu formi, meðhöndlar samkvæmt óskum viðskiptavina sinna, prentar og sendir til viðtakanda. Með þessu móti er hægt að ná fram auknu öryggi við meðferð gagnanna auk þess býður þessi leið upp á að gera gögnin birtingarhæf á rafrænu formi í heimabönkum.

Sjá nánar um gPóst á vef Odda www.oddi.is.

Einkunn

Fyrsta Svansmerkta bæklingnum frá Odda nú dreift í Evrópu

Kynningarbæklingur Ferðaþjónustu bænda, „The Ideal Holiday 2010“, er fyrsti prentgripurinn  sem  framleiddur er hjá Odda sem ber Svansmerkið, norræna umhverfismerkið. Bæklingurinn er prentaður í 25.000 eintökum og er hann kominn í dreifingu í Evrópu og víðar.  „Fyrir okkur, sem fyrirtæki í ferðaþjónustu skiptir umhverfisvottun á því prentverki sem við sendum frá okkur miklu máli.  Þegar við vissum að Prentsmiðjan Oddi væri að fá Svansvottun í lok árs 2009 ákváðum við að seinka útgáfu kynningarbæklingsins um nokkrar vikur til að geta Svansmerkt bæklinginn.  Við viljum að ímynd landsins byggist á hreinleika og náttúru og þess vegna þurfum við sem stöndum að kynningu Íslands að vera til fyrirmyndar. Sýnileiki markvissrar umhverfisvinnu skiptir því miklu máli þegar kemur að því að sýna viljann í verki“  segir Berglind Viktorsdóttir gæðastjóri hjá skrifstofu Ferðaþjónustu bænda sem er vottuð af Green Globe, alþjóðlegum umhverfisvottunarsamtökum í ferðaþjónustu.

Sjá Prentsmiðjuna Odda hér á Grænum síðum, og á Grænu korti í flokknum Grænt fyrirtæki en sá flokkur sýnir öll fyrirtæki á Íslandi sem hafa annað hvort Svaninn eða Green Globe.

Mynd: Sævar Skaptason framkvæmdastjóri Ferðaþjónustu bænda og Berglind Viktorsdóttir gæðastjóri og ritstjóri bæklingsins taka við fyrsta umhverfisvottaða eintakinu hjá Stefáni Hjaltalín sölustjóra hjá Odda.

Einkunn