Náttúran.is lítur á það sem samfélagslega skyldu sína að þróa eins fullkomnar „grænar síður“ fyrir Ísland og mögulegt er. Grænu síðurnar gefi þannig yfirsýn yfir hin fjölmörgu fyrirtæki og stofnanir sem tengjast náttúru og umhverfi á einn eða annan hátt. Grænu síðurnar tengja viðmið og vottanir við fyrirtæki og vörur og gefa hinum almenna neytanda möguleika á að beina viðskiptum sínum þangað sem honum finnst vera stunduð fyrirmyndar starfsemi. Grænar síður eru liður í að gera eftirfarandi markmið Náttúrunnar er ehf. að veruleika:

• Að þróa tæknilegar lausnir að samskiptaveröld sem getur tengt á milli þátta sem annars hafa aðeins huglæga eða óbeina tengingu
• Að auka veg íslenskrar náttúru og náttúruafurða í landkynningarlegu tilliti
• Að efla atvinnutækifæri henni tengdri um allt land og á öllum sviðum
• Að efla þátttöku sem flestra í umhverfimeðvituðum lifnaðarháttum og neyslu sem er síður mengandi eða skaðleg en önnur

Á grænum síðum eru upplýsingar um fyrirtæki og stofnanir sem uppfylla eftirfarandi skilyrði eða stunda eftirtalda starfsemi:

Kynningarbæklingur Ferðaþjónustu bænda, „The Ideal Holiday 2010“, er fyrsti prentgripurinn  sem  framleiddur er hjá Odda sem ber Svansmerkið, norræna umhverfismerkið. Bæklingurinn er prentaður í 25.000 eintökum og er hann kominn í dreifingu í Evrópu og víðar.  „Fyrir okkur, sem fyrirtæki í ferðaþjónustu skiptir umhverfisvottun á því prentverki sem við sendum frá okkur miklu máli.  Þegar við vissum að Prentsmiðjan Oddi væri að fá Svansvottun í lok árs 2009 ákváðum við að seinka útgáfu kynningarbæklingsins um nokkrar vikur til að geta Svansmerkt bæklinginn.  Við viljum að ímynd landsins byggist á hreinleika og náttúru og þess vegna þurfum við sem stöndum að kynningu Íslands að vera til fyrirmyndar. Sýnileiki markvissrar umhverfisvinnu skiptir því miklu máli þegar kemur að því að sýna viljann í verki“  segir Berglind Viktorsdóttir gæðastjóri hjá skrifstofu Ferðaþjónustu bænda sem er vottuð af Green Globe, alþjóðlegum umhverfisvottunarsamtökum í ferðaþjónustu.

Sjá Prentsmiðjuna Odda hér á Grænum síðum, og á Grænu korti í flokknum Grænt fyrirtæki en sá flokkur sýnir öll fyrirtæki á Íslandi sem hafa annað hvort Svaninn eða Green Globe.

Mynd: Sævar Skaptason framkvæmdastjóri Ferðaþjónustu bænda og Berglind Viktorsdóttir gæðastjóri og ritstjóri bæklingsins taka við fyrsta umhverfisvottaða eintakinu hjá Stefáni Hjaltalín sölustjóra hjá Odda.

Vottunarstofan Tún ehf hefur staðfest að fyrirtækið Alkemistinn uppfylli kröfur um lífrænar aðferðir við framleiðslu á snyrti- og heilsuvörum og á tejurtum. Vottorð þessa efnis var afhent á Gamlársdag 2009. Alkemistinn er fyrsta fyrirtækið sem hlýtur vottun til lífrænnar framleiðslu í sveitarfélaginu Reykjanesbæ. Hefur slík starfsemi þar með skotið rótum í ríflega þriðja hverju sveitarfélagi landsins.

Með vottun Túns er staðfest að Alkemistinn noti einungis viðurkennd hráefni við framleiðslu á hinum vottuðu vörum, að aðferðir við úrvinnslu og blöndun samræmist reglum um lífræna framleiðslu, og að gæðastjórnun, skráningar og merkingar uppfylli settar kröfur. Alkemistinn er ungt sprotafyrirtæki sem eigandi þess og framkvæmdastjóri, Daniel Coaten, hefur komið haganlega fyrir í hluta byggingar sem áður hýsti vopnageymslu varnarliðsins á Keflavíkurflugvelli.

Fyrirtækið er því gott dæmi um þá endurmyndun og nýsköpun sem orðið hefur á gamla varnarsvæðinu á Suðurnesjum. Alkemistinn hagnýtir vottuð lífræn hráefni til fjölbreyttrar framleiðslu á ýmsum snyrti- og heilsuvörum. Meðal þeirra má nefna jurtaþykkni og jurtaseyði byggð á útdrætti með olíum og vatni, varasalva, ilm- og húðvörur. Þá framleiðir Alkemistinn einnig lífrænar jurtablöndur til tegerðar. Nú þegar framleiðir fyrirtækið 40 vottaðar lífrænar vörutegundir.

Athugið að nánari upplýsingar um aðila með lífræna vottun er að finna hér á vefnum:
Sjá aðila sem hafa lífræna vottun frá Vottunarstofunni Tún hér á Græna Íslandskortinu og einstaka aðila undir „Vottanir og viðmið“ hér á Grænum síðum og undir „Vörur“ á Grænum síðum er auk þess hægt að finna aðila eftir tegund framleiðslu þeirra.

Ef einhvern tímann er mikil þörf að nýta hráefnið okkar betur og minnka um leið skaðlega áhrif á umhverfið okkar, þá er það nú á niðursveiflutímum.

Það færist í vöxt að fyrirtæki hér á landi taki upp gæðakerfi og umhverisstjórnunarkerfi,  þar sem stór þáttur er að nýta vel hráefnið og skila afgöngum og restum flokkuðum til endurvinnslu og eyðingar. Flokkun úrgangs og endurnýting á hráefni er mikilvæg til að viðhalda hringrásinni. Einnig eru í slíkum umhverfiskerfum og gæðakerfum lagt rík  áhersla að minnka orkunotkun svo sem en rafmagn-, olíu- og vatnsnotkun.

Þetta á við í öllum greinum atvinnulífsins og ekki er síst þörfin í sjávarútvegi þar sem við getum gert enn betur við að nýta hráefnið og vinna það með hreinni framleiðslutækni.

Það hafa verið tekin stór skref til framtíðar í lífrænni ræktun á íslandi og hreinni framleiðslutækni er valla til og vörur frá viðkomandi framleiðendum er í háum gæðaflokki og er bragðgóð vara.

Iðnaðurinn sem ofast byggir á innfluttu hráefni, getur enn aukið nýtingu hráefnis og skil til endurvinnslu og eyðingar. Þar geta fyrirtækin byrjað að stíga sín fyrstu skref með að taka upp ,,létt“ umhverfiskerfi. Fengið ráðgjafar- eða vottunarfyrirtæki til að taka með sér skref fyrir skref í að breyta framleiðslutækni og breyta strúktur fyrirtækisins í umhverfisvænni átt. Verslun, þjónustugreinar og annarskonar fyrirtækjarekstur er ekki undanskilin og allir geta tekið á umhverismálunum í sínum ranni.

Fyrr í mánuðinum fékk Elding / Hvalaskoðun Reykjavík ehf. fullnaðarvottun Green Globe „Green Globe Certified“. Fyrirtækið hefur  unnið að þessu markmiði síðastliðin tvö ár. Green Globe setur viðmið um umhverfis- og samfélagslega frammistöðu fyrirtækjanna í þeim tilgangi að þau fái vottun og bæti sig sífellt á því sviði.

Helstu markmið Eldingar eru:

• Kappkosta að finna lítið/minna mengandi orkugjafa fyrir dagleg störf
• Lágmarka notkun orku
• Lágmarka notkun efna í daglegum störfum
• Lágmarka framleiðslu sorps/ úrgangs og hámarka endurvinnslu
• Nota helst umhverfisvænar og staðbundnar vörur
• Veita starfsfólki reglulega fræðslu um umhverfis- og öryggismál
• Fræða gesti um lífríki hafsins og umhverfið sem við störfum í

En umhverfisvottun snýst ekki einungis um umhverfismál, heldur tekur það ferli einnig til þátta eins og siðferðis, sanngjarnra viðskiptahátta og félagslegrar ábyrgðar og mótar fyrirtækið sér þ.a.l. heildstæða stefnu í átt til sjálfbærrar þróunar. Ferlið að umhverfisvottun er árangursríkt stýritæki fyrir fyrirtækið, bæði á sjó sem og á landi.

Mætum þörfum nútímans án þess að ganga á möguleika framtíðarinnar!

Forsvarmenn Eldingar tala af reynslu þegar þeir segja að ávinningur sé af því fyrir íslensk ferðaþjónustufyrirtæki að tileinka sér umhverfisstefnu í rekstri sínum enda geti það gegnt lykilhlutverki í sjálfbærri uppbyggingu til framtíðar í íslenskri ferðamennsku.  Það að tileinka sér umhverfisvottun í ferðaþjónustu getur skapað aukin sóknarfæri þar sem fyrirtæki í greininni geta styrkt ímynd sína, bætt samkeppnistöðu í því markaðsumhverfi sem þau starfa og þetta er í leiðinni ákveðinn gæðastimpill til neytandans, í tilviki Eldingar, ferðamannsins. Þeir telja því  að umhverfisvottun sé árangursríkt tæki til að vinna eftir. Í fyrsta lagi er náttúran helsta aðdráttarafl sem ferðaþjónusta á Íslandi byggist á, það hlýtur því að vera ávinningur fyrir alla að vel sé haldið utan um þá auðlind. Í öðru lagi felur umhverfisstjórnun í sér ákveðna sjálfbærni og getur því verið hvati á sitt nánasta umhverfi og rennt styrkari stoðum undir atvinnulíf á svæðinu.

Sjá hér á grænum síðum þau fyrirtæki og sveitarfélög á Íslandi sem hlotið hafa fullnaðarvottun Green Globe. Elding / Hvalaskoðun Reykjavík hefur auk þess Bláfánann, sjá hverjir hafa Bláfánann á Íslandi.
Skoðaðu einnig hérna á græna kortinu þau fyrirtæki á Íslandi sem geta sannarlega talist vinna á sviði umhverfisvænnar ferðaþjónustu.