Náttúran.is

Vöruleit Náttúrunnar

Vörurleitin á Náttúrumarkaði gefur þér kost á að þrengja leitina til að finna vörur sem uppfylla þær kröfur sem þú gerir til framleiðanda, merkingar eða viðurkenndrar vottunar. Sjá hér til hægri undir Vöruleit á Náttúrumarkaði. Vöruleitin nýtist vel til vistvænna innkaupa opinberra aðila jafnt sem fjölskyldunnar.

Allar vörur sem skráðar eru á Náttúrumarkað koma upp í Vöruleit, hvort sem þær eru til sölu eða einungis skráðar til kynningar. Hver sem er getur óskað eftir skráningu á vöruframboði sínu á Náttúrumarkað og þannig tekið þátt í því að bjóða kaupendum upp á að bera saman breitt úrval af vörum út frá vistvænum sjónarmiðum. Sjá nánar um verð á skráningum hér að neðan.

Auk þess tengjast vörurnar ítarefni um innihaldsefni, umhverfisviðmið, endurvinnsluleiðir auk þess að tengjast fréttum um viðkomandi vöru, framleiðanda og aðra tengda aðila.

F - kubbur fyrir vörur á Náttúrumarkaði - vöruskráningu fylgir auglýsingabirting í slembivali

Verð á 12 mánaða skráningu vöru á Náttúrumarkað:

1 - 3 vörur - skráning á vöru (til sölu) 4.900*. Á vöru til kynningar (ekki til sölu) 9.800*
4 - 10 vörur - skráning á vöru (til sölu) 3.920*. Á vöru til kynningar (ekki til sölu) 6.840*
11 vörur eða fl. - skráning á vöru (til sölu) 3.330*. Á vöru til kynningar (ekki til sölu) 6.600*

*Öll verð í íslenskum krónum, án vsk. 50% afsláttur er af framlengingu skráningar eftir fyrsta árið.

Einkunn

Niðursuðuverksmiðjan Akraborg ehf. fær MSC vottun

Framleiðsla á matvörum úr vottuðum sjálfbærum þorskveiðum við Íslandsstrendur uppfyllir alþjóðlegar kröfur

Vottunarstofan Tún hefur staðfest að fyrirtækið Akraborg ehf. á Akranesi uppfylli kröfur Marine Stewardship Council (MSC) um rekjanleika sjávarafurða sem upprunnar eru úr MSC-vottuðum sjálfbærum fiskveiðum. Vottunin var formlega staðfest með útgáfu vottorðs sem Rolf Hákon Arnarson framkvæmdastjóri Akraborgar ehf. hefur nú veitt viðtöku.

MSC-rekjanleikavottun (MSC Chain of Custody certification) staðfestir að hráefni og afurðir eru upprunnar úr sjálfbærum fiskistofnum. En slík vottun hefur breiðst hratt út á undanförnum árum samfara aukinni eftirspurn á alþjóðlegum mörkuðum eftir sjávarafurðum úr vottuðum nytjastofnum. MSC-vottunin greiðir íslenskum fyrirtækjum leið inn á gæðamarkaði sem skila hærra söluverði.

Með þessari vottun er staðfest að Akraborg ehf. viðhafi gæðastýringu sem tryggi aðgreiningu MSC-vottaðra fiskafurða frá öðrum hráefnum og afurðum á öllum stigum, þ.e. við móttöku hráefna, meðferð þeirra og flutning, auðkenningu í skráningarkerfum, merkingar á umbúðum og viðskiptaskjölum. Rekjanleikavottun samkvæmt staðli MSC gerir Akraborg ehf. kleift að afla sér hráefna og afurða úr MSC-vottuðum fiskveiðum og fiskistofnum, vinna frekar úr þeim og markaðssetja síðan með tilvísun til sjálfbærra sjávarnytja undir hinu þekkta vörumerki Marine Stewardship Council.  Vottunin sem Akraborg hlýtur nú tekur til framleiðslu og sölu á niðursoðinni lifur auk afurða unnum úr hrognum og svilum úr vottuðum þorski sem veiddur er á Íslandsmiðum.

Akraborg ehf. er fiskvinnslufyrirtæki á Akranesi sem framleiðir ýmsar vörur úr íslensku sjávarfangi, einkum úr þorski, en einnig úr öðrum tegundum svo sem skötusel, loðnu og smásíld. Fyrirtækið sérhæfir sig í framleiðslu á niðursoðinni þorskalifur. Hráefna sinna aflar Akraborg ehf. ferskra hjá útgerðar- og fiskvinnslufyrirtækjum víðs vegar um landið, meðal annars hjá fyrirtækjum sem veiða úr vottuðum sjálfbærum nytjastofnum. Hjá Akraborg starfa um 30 manns og eru vörur þess seldar víða um heim, m.a. í Evrópulöndum, Asíu og Norður Ameríku. Rolf Hákon Arnarson framkvæmdastjóri Akraborgar segir MSC vottun mikilvægan áfanga í sölumálum fyrirtækisins. „Eftirspurn eftir MSC vottuðum vörum hefur aukist jafnt og þétt undanfarið og svo komið að sumir kaupendur neita að kaupa nema MSC vottun sé til staðar. Vottunin er því stór áfangi fyrir Akraborg og mun verða okkur mikill styrkur til framtíðar.“

Gísli Gíslason ráðgjafi MSC á Íslandi segir að á undanförnum árum hafi orðið vitundarvakning um nauðsyn þess að vernda auðlindir sjávar og  stuðla að sjálfbærri nýtingu fiskistofna: “Íslenskt sjávarfang er eftirsótt og þekkt fyrir gæði víða um heim en á mörkuðum er vaxandi krafa afurðir komi úr vottum sjálfbærum fiskveiðum.  Nú hefur Akraborg fengið rekjanleikavottun samkvæmt kerfi MSC.  Þetta þýðir að Akraborg getur framleitt MSC vottaða þorsklifur þegar fyrirtækið kaupir hráefni úr MSC vottuðum þorsk veiðum í sína vinnslu. Þannig er staðfest  að hráefnið í þeirri afurð komi úr sjálfbærum veiðum sem hafa staðist staðla MSC, sem er útbreiddasta og þekktasta vottunarkerfi fyrir sjálfbærar fiskveiðar í heiminum í dag.”

Marine Stewardship Council hefur þróað staðla í samræmi við viðmiðunarreglur Matvæla- og landbúnaðarstofnunar Sameinuðu þjóðanna (FAO) um ábyrgar fiskveiðar. Vottunarkerfi MSC nær annars vegar til úttekta á fiskistofnum og fiskveiðum og hinsvegar til rekjanleika á fiski og fiskafurðum úr vottuðum stofnum. Hátt á þriðja hundrað fiskveiðiútgerða eru ýmist vottaðar eða í vottunarferli MSC víða um heim, og skila þær árlega 9 m tonnum matfiskjar á land. Yfir 10.000 vörumerki í 74 löndum eru nú rekjanleg til þessara fiskveiða og bera því merki MSC á mörkuðum víða um heim. (Sjá nánar heimasíðu MSC, www.msc.org).

Vottunarstofan Tún hefur haft forgöngu um vottun lífrænna aðferða og sjálfbærra náttúrunytja hér á landi, í Færeyjum og á Grænlandi allt frá árinu 1994. Tún er faggild af Einkaleyfastofunni skv. staðli EN45011 og hlaut nýlega faggildingu þýsku faggildingarstofunnar Accreditation Services International GmbH (ASI) til þess að annast vottun samkvæmt stöðlum MSC um sjálfbærar fiskveiðar og rekjanleika afurða úr slíkum veiðum. Tún nýtur krafta reyndra íslenskra og erlendra sérfræðinga við vottun sjálfbærra sjávarnytja.

Ljósmynd: Rolf Hákon Arnarson framkvæmdastjóri (fyrir miðju) tekur við vottorði um MSC vottun Akraborgar ehf. úr hendi Gunnars Á. Gunnarssonar framkvæmdastjóra Vottunarstofunnar Túns ehf. (t.v.) að viðstöddum Gísla Gíslasyni ráðgjafa Marine Stewardship Council á Íslandi (t.h.).

Einkunn

Fyrsta íslenska MSC vottunin í höfn

Þorsk- og ýsuveiðar á Íslandsmiðum standast alþjóðlegar kröfur um sjálfbæra nýtingu

Sæmark sjávarafurðir ehf. hlýtur nú, fyrst íslenskra sjávarútvegsfyrirtækja, vottun samkvæmt stöðlum Marine Stewardship Council (MSC) um sjálfbærar fiskveiðar. Að baki liggur langt og ítarlegt matsferli sérfræðinga Vottunarstofunnar Túns. Þessi fyrsta íslenska MSC vottun verður formlega staðfest með útgáfu vottorða sem Svavar Þór Guðmundsson, framkvæmdastjóri Sæmarks, veitir viðtöku fimmtudaginn 23. júní nk. kl. 17 í Turninum við Smáratorg.

Sæmark sjávarafurðir ehf. er fiskútflutningsfyrirtæki sem annast markaðssetningu sjávarafurða frá útgerðar- og fiskvinnslufyrirtækjum víðs vegar um landið, en fjögur þeirra tóku þátt í þessu verkefni: Fiskvinnslan Íslandssaga hf. á Suðureyri, Hraðfrystihús Hellissands hf., Oddi hf. á Patreksfirði og Þórsberg ehf. á Tálknafirði.

Vottunin staðfestir að þorsk- og ýsuveiðar þessara útgerða með handfærum, línu og dragnót uppfylla kröfur MSC um sjálfbæra nýtingu fiskistofna, skynsamlega stjórnun fiskveiða og tillitsemi við vistkerfi sjávar.

Meðal viðstaddra við afhendinguna verða Jón Bjarnson sjávarútvegsráðherra, Rupert Howes forstjóri MSC og Ally Dingwall framkvæmdastjóri sjávarafurða hjá verslunarkeðjunni Sainsbury í Bretlandi. En Sainsbury dreifir drjúgum hluta þorsks- og ýsuafla sem veiðist hér við land á línu og handfæri.

MSC vottun Sæmarks færir heim sanninn um að íslenska fiskveiðistjórnunarkerfið hefur burði til að tryggja sjálfbærar fiskveiðar. Vaxandi þrýstingur er á dreifingar- og söluaðila á alþjóðamörkuðum að útvega sjávarafurðir úr vottuðum sjálfbærum fiskistofnum. Með hliðsjón af þróun undanfarinna ára má heita ljóst að afurðir sem hafa hlotið slíka vottun eiga mun greiðari aðgang að erlendum neytendamörkuðum en óvottaðar vörur.

Íslenskt sjávarfang er eftirsótt og þekkt fyrir gæði víða um heim. Umhverfisvottun þriðja aðila er megin forsenda þess, að fiskafurðir héðan njóti fyrir það sannmælis á erlendum mörkuðum, bæði í eftirspurn og útflutningsverðmæti.

MSC umhverfisvottunin hefur sótt hratt fram síðustu ár og eru meira en 10.000 vörumerki vottuð í 74 löndum. Ekkert vottunarkerfi hefur náð viðlíka útbreiðslu enda eru útgerðir sem afla 9 milljóna tonna matfiskjar ýmist vottaðar eða í vottunarferli um þessar mundir. Nokkrir helstu nytjastofnar á fiskimiðum grannlanda okkar hafa þegar hlotið MSC vottun, m.a. þorskur og ýsa í Barentshafi, ufsi við Noreg, síldveiðar við Færeyjar og rækja við Kanada.

Staðlar MSC byggja á viðmiðunarreglum Matvæla- og landbúnaðarstofnunar Sameinuðu þjóðanna (FAO) um ábyrgar fiskveiðar. MSC umhverfisvottunin staðfestir að fiskveiðar séu byggðar á sjálfbærri nýtingu fiskistofna, skynsamlegri stjórnun fiskveiða og tillitsemi við vistkerfi sjávar. Markmið MSC er að stuðla að bættri umgengni um auðlindir sjávar og að auka eftirspurn eftir umhverfisvottuðum sjávarafurðum. Vottunin byggir á heildstæðu mati á ástandi fiskistofna, veiðiaðferðum og fiskveiðistjórnun. Vottuð neysluvara úr MSC vottuðum fiskveiðum getur borið vottunarmerki MSC. (Sjá nánar heimasíðu MSC, www.msc.org).

Vottunarstofan Tún hefur haft forgöngu um vottun lífrænna aðferða og sjálfbærra náttúrunytja hér á landi, í Færeyjum og á Grænlandi allt frá árinu 1994. Tún er faggild af Einkaleyfastofunni skv. staðli EN45011 og hlaut nýlega faggildingu þýsku faggildingarstofunnar Accreditation Services International GmbH (ASI) til þess að annast vottun samkvæmt stöðlum MSC um sjálfbærar fiskveiðar og rekjanleika afurða úr slíkum veiðum. Tún nýtur krafta reyndra íslenskra og erlendra sérfræðinga við vottun sjálfbærra sjávarnytja.

Ljósmynd: Frá afhendingu MSC vottunarinnar þ. 23.06.2011.

Einkunn

Matsskýrsla um sjálfbærni þorsk-, ýsu- og steinbítsveiða við Ísland birt til umsagnar

Vottunarstofan Tún hefur tilkynnt birtingu skýrslu um mat á sjálfbærni þorsk-, ýsu- og steinbítsveiða við Íslandsstrendur. Um er að ræða mat á nokkrum fiskveiðiútgerðum undir forystu fiskútflutningsfyrirtækisins Sæmarks sjávarafurða. Útgerðarfyrirtækin gera út á handfæri, línu og dragnót, einkum við vestan- og norðanvert landið. Matið fer fram samkvæmt vottunarreglum Marine Stewardship Council (MSC), en þær byggjast m.a. á viðmiðunarreglum FAO um ábyrgar fiskveiðar.

Sæmark sjávarafurðir eru fyrsta íslenska fyrirtækið sem fer í gegnum slíkt mat (sjá frétt). Matsskýrslan, sem unnin er af sérfræðinefnd Vottunarstofunnar Túns, liggur nú frammi á heimasíðu MSC (sjá skýrsluna hér) og gefst þeim sem telja sig eiga hagsmuna að gæta tækifæri til að bera fram athugasemdir, fyrirspurnir og tillögur um efni skýrslunnar fram til 22. apríl n.k.

Einkunn

Sjávarafurðir úr sjálfbærum fiskveiðum - Tún veitir fyrstu vottorð sín skv. MSC-staðli

Sjóvík ehf. og Fram Foods Ísland hf. fá vottun til vinnslu og viðskipta með MSC-vottaðar sjávarafurðir

Vottunarstofan Tún hefur staðfest að fyrirtækin Sjóvík ehf. og Fram Foods Ísland hf. uppfylli kröfur Marine Stewardship Council (MSC) um rekjanleika sjávarafurða sem upprunnar eru úr MSC- vottuðum sjálfbærum fiskveiðum. Vottorð þessa efnis verða formlega afhent í Þjóðmenningarhúsinu í Reykjavík í dag, þriðjudaginn 28. desember 2010 kl. 13.30.

MSC-rekjanleikavottun (MSC Chain of Custody certification) staðfestir að hráefni og afurðir eru upprunnar úr sjálfbærum fiskistofnum. En slík vottun hefur breiðst hratt út á undanförnum árum samfara aukinni eftirspurn á alþjóðlegum mörkuðum eftir sjávarafurðum úr vottuðum nytjastofnum. Fram til þessa hafa íslensk fyrirtæki þurft að sækja þessa eftirsóttu vottun erlendis, með tilheyrandi fyrirhöfn og viðbótarkostnaði, en MSC-vottunin greiðir þeim leið inn á gæðamarkaði sem skila hærra söluverði.

Með þessari vottun er staðfest að hin vottuðu fyrirtæki viðhafi gæðastýringu sem tryggi aðgreiningu MSC-vottaðra fiskafurða frá öðrum hráefnum og afurðum á öllum stigum, þ.e. við móttöku hráefna, meðferð þeirra og flutning, auðkenningu í skráningarkerfum, merkingar á umbúðum og viðskiptaskjölum. Að baki liggur ferli ítarlegra úttekta á starfsemi fyrirtækjanna og úrbætur þar sem þeirra var þörf. Rekjanleikavottun samkvæmt staðli MSC gerir hinum vottuðu fyrirtækjum kleift að afla sér hráefna og afurða úr MSC-vottuðum fiskveiðum og fiskistofnum, vinna frekar úr þeim og markaðssetja síðan með tilvísun til sjálfbærra sjávarnytja undir hinu þekkta vörumerki Marine Stewardship Council.

Sjóvík ehf. var stofnað árið 1999. Sjóvík er dótturfyrirtæki Icelandic Group. Sjóvík á og rekur fiskvinnslur í Kína og Tælandi. Sjóvík sérhæfir sig í vinnslu á sérunnum afurðum úr Kyrrahafsþorski og Alaskaufsa fyrir veitingahús og smásölu. Björn Maríus Jónasson framkvæmdastjóri markaðsmála Sjóvíkur ehf. segir að “MSC vottunin gerir okkur kleyft að verða við kröfum þeirra viðskiptavina okkar sem ætlast til þess að við bjóðum þeim vörur sem sannarlega eru unnar úr fiskistofnum þar sem veiðistjórnunin hefur sjálfbærni að leiðarljósi.”

Fram Foods Ísland hf. var áður Bakkavör Ísland hf. og varð til árið 2003 þegar Bakkavör Group hf. seldi frá sér rekstur félagsins. Hjá fyrirtækinu starfa 18 manns, en í verksmiðju þess í Reykjanesbæ eru framleiddar ýmsar afurðir úr hrognum bolfiskjar, grásleppu, loðnu og síldar. Helmingur framleiðslunnar fer til systurfyrirtækja í Svíþjóð, Frakklandi og Finnlandi, og er þar um að ræða hálfunnar afurðir sem fara í framleiðslu á neytendavöru hjá hverju félagi fyrir sig. Aðrir kaupendur eru t.d. í USA, UK, Ástralíu og Frakklandi. Árlegur vöruútflutningur nemur 1000 tn. Svanhildur Leifsdóttir framkvæmdastjóri fyrirtækisins segir að “vottunin sem við höfum hlotið nú er til framhaldsvinnslu á MSC vottuðum síldarhrognum. Með vottuninni náum við að vinna þessa vöru áfram hér heima. Þessi vara fer svo áfram til Finnlands þar sem hún er notuð í síldarsósu.”

Sjálfbærar sjávarnytjar og vottun þeirra

Á undanförnum árum hefur orðið vitundarvakning um nauðsyn þess að vernda auðlindir sjávar og bæta þar sem tjón hefur orðið sakir ofveiði. Með vottun sjálfbærra sjávarnytja á grundvelli viðurkenndra staðla er tekið afgerandi skref í þá átt.
Marine Stewardship Council hefur þróað staðla í samræmi við viðmiðunarreglur Matvæla- og landbúnaðarstofnunar Sameinuðu þjóðanna (FAO) um ábyrgar fiskveiðar. Vottunarkerfi MSC nær annars vegar til úttekta á fiskistofnum og fiskveiðum og hinsvegar til rekjanleika á fiski og fiskafurðum úr vottuðum stofnum. Hátt á þriðja hundrað fiskveiðiútgerða eru ýmist vottaðar eða í vottunarferli MSC víða um heim, og skila þær árlega 7 m tonnum á land sem samsvarar yfir 12% af heildar matfiskafla heimsins. Yfir 7000 vörutegundir eru nú rekjanlegar til þessara fiskveiða og bera því merki MSC á mörkuðum víða um heim.
Vottunarstofan Tún ehf. hóf þjónustu á sviði sjálfbærra sjávarnytja árið 2008 og vinnur nú m.a. að fyrsta MSC-aðalmati sem gert er á nýtingu íslenskra fiskistofna, þ.e. á línu-, handfæra- og dragnótaveiðum á þorski, ýsu og steinbít á vegum Sæmarks sjávarafurða ehf.

Sjóvík ehf. og Fram Foods Ísland hf. eru fyrstu íslensku fyrirtækin sem hljóta vottun Vottunarstofunnar Túns samkvæmt stöðlum um rekjanleika MSC-vottaðra sjávarafurða.

Ljósmynd: Svanhildur Leifsdóttir framkvæmdastjóri Fram Foods Ísland hf. og Björn Maríus Jónasson markaðsstjóri Sjóvíkur ehf. eftir að hafa tekið við vottorðum í Þjóðmenningarhúsinu í dag.
Grafík: Vottunarmerki MSC.

Einkunn