Ný reglugerð um þvotta- og hreinsiefni hefur tekið gildi. Með reglugerðinni eru innleiddar reglugerðir Evrópusambandsins sama efnis. Samræmdar reglur um markaðssetningu þvotta- og hreinsiefna tóku gildi í Evrópusambandslöndunum fyrir þremur árum og voru að þó nokkru leyti byggðar á eldri tilskipunum og starfsreglna þvottaefnaiðnaðarins.

Þvotta- og hreinsiefni innihalda yfirborðsvirk efni og með reglugerðinni eru gerðar strangari kröfur en fyrr um lágmarks lífbrjótanleika þeirra. Með reglugerðinni er einnig komið á skyldubundnum merkingum á umbúðum þvotta- og hreinsiefna og þar skulu nú talin upp helstu innihaldsefni og þá sérstaklega rotvarnarefni og ilmefni. Þvottaefni skal sérstaklega merkja með upplýsingum um skammtastærðir og fjölda þvottaskammta í pakkningu. Tæmandi listi yfir innihaldsefni skal vera aðgengilegur starfsfólki á sjúkrastofnunum og þá skulu framleiðendur og innflytjendur gefa upp veffang á umbúðum þar sem nálgast má hliðstæðar upplýsingar.

Skammtastærðir þvottaefna eru gefnar upp fyrir þrenns konar hörku vatns. Íslenskir neytendur geta í langflestum tilfellum gengið út frá því að þvottavatn þeirra sé mjúkt eða í lægsta hörkuflokki sem gefinn er upp á umbúðum.

Reglugerð nr. 708/2008 um þvotta- og hreinsiefni.

Birt:
Aug. 28, 2008
Höfundur:
Umhverfisstofnun
Uppruni:
Umhverfisstofnun
Tilvitnun:
Umhverfisstofnun „Ný reglugerð um þvotta- og hreinsiefni“, Náttúran.is: Aug. 28, 2008 URL: http://www.natturan.is/d/2008/08/28/ny-reglugero-um-thvotta-og-hreinsiefni/ [Skoðað:Aug. 5, 2020]
Efni má nota eða vitna í samkvæmt almennum venjum sé heimilda getið með slóð eða fullri tilvitnun hér að ofan.

Messages: